Денес, во Музејот на љубовта и уметноста во Радовиш, се одржа првата форумска сесија во рамките на проектот „Зајакнување на општинските совети“, на која учество зедоа претставници на локалната самоуправа, институции, граѓански организации и граѓани.
Форумската сесија ја отвори градоначалникот на Општина Радовиш, Љупче Почивалец, кој во своето воведно обраќање ја истакна важноста од активно учество на граѓаните во креирањето на локалните политики и донесувањето одлуки од интерес за заедницата.
Во текот на сесијата беше презентиран форумскиот процес, неговите цели, активности и очекувани резултати. Присутните дискутираа за можните форумски теми и преку заедничка дебата ја избраа приоритетната тема за понатамошна работа. Потоа беше усвоена структурата на форумот и утврдени беа начелата за работа.
Во вториот дел од сесијата, учесниците работеа на идентификација и дефинирање на клучните проблеми, разменуваа предлози за можни решенија, проектни идеи и препораки. На крајот беше презентиран форматот за изработка на концепт-предлог проект, формирана беше работна група за анализа на избраната тема и беше договорен терминот за одржување на следната форумска сесија.
Форумскиот процес го водеа модераторот Гонце Јаковлевска и ко-модераторот Лазар Газепов, додека координатор на проектот е Весна Конзулова, кои преку својата стручност и координација придонесоа за успешно реализирање на првата форумска сесија.
Општина Радовиш останува посветена на транспарентно, инклузивно и партнерско работење со граѓаните, со цел создавање поквалитетни локални политики и подобри услови за живот во заедницата.